Never Sky – 永不．忘記

近況

其實近況並不太好….

我已經開始搵緊工, 一見到有公司請人, 我都會send cv去, 期望…只要有萬二蚊一個月, 我都好願意辭去而家份工…
雖然而家份工收入穩定, 但係我做得真係超唔開心。
近日公司出左memo, 話提議由現時一年合約, 轉為兩年合約制…
不過對於我呢種去意已決ge人黎講, 呢d完全不能挽留到我個心…
在我遞辭職信之前, 希望有其它公司願意in我…

回顧8月份投資….
買賣811新華文軒, 賺左700幾蚊…
以及依次買入工商銀行(1398.hk)、瑞安房地產(272.hk)、奧普集團控股(477.hk), 投資金額比例約為6:3:1
升貶值分別為:+1.25%、-0.68%、+2.64%(已扣手續費)
買入原因如下:
工行—之前玩厭左建行, 所以現在玩下工行而已, 現時建行同工行投資金額比例係1:1, 中資銀行股增長仍然強勁, 加上小弟想供股, 所以買多d貨, 準備供股。現有後備資金, 佔投資組合市值3.5%, 足夠供股有餘。食下波幅都好正!

瑞安—好簡單, 利潤率非常高, 除左本人持有SOHO中國(410.hk)外, 瑞安係我組合中兩隻內房股重磅之一。我鍾意佢派息姑寒, 中期派息較去年同期升左5倍且與07及08年中期息相約, 但係派息比率只係中期盈利20%左右, 股價對淨資產仍有折讓, 股息率3.7%, 實屬長線投資好選擇。缺點係短期受中央調控制肘以及內地通脹升溫, 利率己見低, 來年加息空間都好大。屬中度風險。

奧普—股東回報率及利潤率均有所提高, 中期盈利亦超越了07及08年同期數據, 派息極度慷慨兼送紅股, 流動比率高, 股息率為8.3%, 其產品的可替代性高, 屬中度風險。

投資涉及風險, 以上純屬個人立場, 請各位自行分析先決定投資路向。

月供基金還是提早償還樓按本金好?

近日有保險從業員幫我做理財, 自己發覺自己真係就算月入萬五蚊都係唔夠用, 因為自己要供樓, 要比保險費, 如果計埋家用, 每個月真係清袋。

現在如果買基金, 我要賣血先夠錢供……
就算真係買基金, 我好有可能要從日常開支中再減才行。

昨晚我替自己計一計數, 究竟選擇月供基金定提早償還供樓本金好?
發現, 月供基金的確係好, 不過亦有其缺點, 就係年回報同埋按歇息率係不確定因素, 所以要好保守咁去計一計先。

如果選擇月供基金, 我就一定草唔到應急現金, 萬一有咩意外, 隨時無錢救命。

我用excel計左數, 大家可以下載去睇, 連結如下:

尾班車

今朝落盤買新華文軒(811), 以4.14蚊成交左1萬股, 亦係今日唯一最低價….真係估唔到…
之前都買左少少, 今次買入純粹加注。

買佢個理由好簡單, 就是”感覺”, 言而投資最忌就係唔夠理性…不過今次買入我係好理性咁靠感覺去買的。

不過點都要講d理由….
1. 息率高, 7%以上 (包括特別股息)
2. 現金充裕, 公司已開始擴充業務, 不斷進行股權投資。

有少少缺點就係涉足少許地產業務, 及可能會因為擴充業務令現金下降, 影響派息, 不過仍屬合理情況。
另外, 睇佢年報, 我對武強呢個非執行董事, 不太喜歡。就是對佢有點偏見…其餘整體公司都表現唔錯, 年年收入派息都好穩健, 相信對股東有好回報。

總結, 今日都係冷手執個熱煎堆, 尾市仲要以高位收市, 似乎係因為20號開會審議業績, 對佢有少少憧憬。
不過我會等到中期業績公佈後決定是否繼續持有。

後記: 近日睇住1126升到媽媽聲, 真係揼心口…好後悔0.8放左…不過我唔會高追。

“我唔保得你幾多次, 再有下次我隨時上去madam度講”

1. 前日, 就有關M17而出證明期間, 因為拖了一個星期才出, 而比人話…
我無野好講, 人手就係咁多, 做唔到就係做唔到, 你屈我食死貓, 我食。
2. 前日, 就有關失蹤檔案事宜, 因為我無去搵, 要其它上級去搵, 而比人話…
我無野好講, 首次發現失蹤檔案ge人係我, 亦係我第一個自己去搵, 自己搵晒成個寫字樓都無, 但係我搵ge時候, 上級你又知唔知? 在新軍職黎之前其它同事又無幫過我手。新軍職黎到, 唔係我要你地上級搵, 我覺得係你地想搵我去揹黑鑊。自己一個人去承受個申請人日日黎煩我, 又要面對你地呢d上級, 你估我好好受呀? 不過, 就算我解釋之前我有搵過ge事都係多餘, 因為你地眼中, 我係異類。呢個死貓, 我食。
3. 今日, 就有關M17出證明後沒有打電話通知當事人黎收取, 而比人話…
一直以黎, 教我ge師兄都講過, 從來唔需要通知, 亦從來無人講過一定要通知。但上級你話”唔係今年講過, 上年我’一定有’落過order要通知人黎攞。” 你呢句”一定有”真係精闢啦…我無野好講。姦淫擄掠ge申請人,M17返黎出證明都要通知的話, 我寫個服字比你。上左居留紙落番黎, 要我地在幾十份入面搵番出黎通知人, 你係唔係有問題? 索性為呢d M17及聲明書類別個案設定一個服務承諾好過….呢d無服務承諾ge個案, 點解要咁緊張?
4. 今日, 上級你話”我唔保得你幾多次, 再有下次我隨時上去madam度講, 我發火隨時收唔到…”
我收到。等我11月放完大假之後, 我就會繕寫辭職信的。好黎好去, 過埋呢個超齡子女ge浪, 我就會走。

我心淡了。從來, 只有我去承受, 正常申請係我去跟,特殊個案都係交給我去跟, 有鑊就梗係我跟埋。就算新任組長黎左一個月, 要插ge人始終都係搵我。